JANATAA24 NEWS DESK
CN Halli:ಅಮ್ಮನ ನೋವನು ಕಂಡು ಶಿಕ್ಷಣ ತ್ಯಾಗ ಮಾಡಿದ ಮಗ.!
ಚಿಕ್ಕನಾಯಕನಹಳ್ಳಿ ತಾಲ್ಲೂಕಿನ ಸಿಂಗದಹಳ್ಳಿ (ಗೋವಿಂದಪ್ಪನ ಪಾಳ್ಯ) ಗ್ರಾಮದಲ್ಲಿ ಒಂದು ಬಡ ಕುಟುಂಬದ ಬದುಕು ಇಂದು ಸಂಕಷ್ಟದ ಅಂಚಿನಲ್ಲಿದೆ. ಮಂಜಮ್ಮ (42) ಮತ್ತು ಅವರ ಪತಿ ನರಸಿಂಹಯ್ಯ ಅವರ ಕುಟುಂಬ ದಾರಿದ್ರ್ಯ, ಕಾಯಿಲೆ ಮತ್ತು ಅನಿಶ್ಚಿತ ಭವಿಷ್ಯದ ನಡುವೆ ಹೋರಾಟ ನಡೆಸುತ್ತಿದೆ.
ದಿನಗೂಲಿ ಕಾರ್ಮಿಕನಾದ ನರಸಿಂಹಯ್ಯ ಅವರು ದಿನಕ್ಕೆ ₹300–400 ಗಳಿಸಿ ಕುಟುಂಬವನ್ನು ಸಾಗಿಸುತ್ತಿದ್ದಾರೆ. ಆದರೆ ಈ ಕಡಿಮೆ ಆದಾಯದಲ್ಲಿ ಪತ್ನಿಯ ಚಿಕಿತ್ಸೆಯ ಖರ್ಚು ಹಾಗೂ ಕುಟುಂಬದ ಅಗತ್ಯಗಳನ್ನು ನಿಭಾಯಿಸುವುದು ಅಸಾಧ್ಯವಾಗಿದೆ.
ಇವರ ವಾಸದ ಮನೆ ಸುಮಾರು 30 ವರ್ಷ ಹಳೆಯದಾಗಿದ್ದು, ಸಂಪೂರ್ಣ ಶಿಥಿಲಾವಸ್ಥೆಯಲ್ಲಿದೆ. ಯಾವ ಕ್ಷಣದಲ್ಲಾದರೂ ಕುಸಿದು ಬೀಳುವ ಭೀತಿಯಲ್ಲಿ ಕುಟುಂಬವು ಜೀವಿಸುತ್ತಿದೆ. ಮಳೆಗಾಲದ ಸಮಯದಲ್ಲಿ ಈ ಭೀತಿ ಇನ್ನಷ್ಟು ಹೆಚ್ಚಾಗುತ್ತದೆ.
ಕುಟುಂಬದ ಸಂಕಷ್ಟ ಕಂಡು ಅವರ ಮಗ ಚೇತನ್ ಕುಮಾರ್ (17) ತನ್ನ 10ನೇ ತರಗತಿಯ ವಿದ್ಯಾಭ್ಯಾಸವನ್ನು ಮಧ್ಯದಲ್ಲೇ ನಿಲ್ಲಿಸಿ ತಂದೆಯ ಜೊತೆ ಕೂಲಿ ಕೆಲಸಕ್ಕೆ ಇಳಿದಿದ್ದಾನೆ. ಬಾಲ್ಯದಲ್ಲೇ ಹೊಣೆಗಾರಿಕೆಯ ಹೊರೆ ಹೊತ್ತಿರುವ ಈ ಯುವಕನ ಭವಿಷ್ಯ ಕತ್ತಲೆಯಲ್ಲಿದೆ.
ಮಂಜಮ್ಮ ಅವರು ಚಿಕನ್ ಗುನ್ಯಾ ರೀತಿಯ ಗಂಭೀರ ಕಾಯಿಲೆಯಿಂದ ಬಳಲುತ್ತಿದ್ದು, ಕಾಲುಗಳು ಸಂಪೂರ್ಣ ನಿಶಕ್ತವಾಗಿವೆ. ಸ್ವತಃ ನಡೆಯಲು ಸಾಧ್ಯವಿಲ್ಲದ ಸ್ಥಿತಿಯಲ್ಲಿ ಇದ್ದು, ದಿನನಿತ್ಯದ ಕೆಲಸಗಳಿಗೂ ಇತರರ ಮೇಲೆಯೇ ಅವಲಂಬಿತರಾಗಿದ್ದಾರೆ. ಸರ್ಕಾರಿ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಪಡೆದ ನಂತರ ಹೆಚ್ಚಿನ ಚಿಕಿತ್ಸೆಗೆ ಬೆಂಗಳೂರಿನ ನಿಮಾನ್ಸ್ ಆಸ್ಪತ್ರೆಗೆ ದಾಖಲಿಸಲು ವೈದ್ಯರು ಸಲಹೆ ನೀಡಿದ್ದರೂ, ಹಣಕಾಸಿನ ಕೊರತೆಯಿಂದ ಚಿಕಿತ್ಸೆ ಮುಂದುವರಿಸಲಾಗಿಲ್ಲ.
ಅವರ ದೈಹಿಕ ಸ್ಥಿತಿಯಿಂದ ಸರ್ಕಾರದ ಮಾಸಾಶನ ಪಡೆಯಲು ಅಂಚೆ ಕಚೇರಿಗೆ ಹೋಗುವುದೇ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಇದು ಬಡ ಕುಟುಂಬಗಳಿಗಾಗಿ ಇರುವ ಕಲ್ಯಾಣ ಯೋಜನೆಗಳ ಪ್ರಾಯೋಗಿಕ ಸಮಸ್ಯೆಗಳನ್ನೂ ತೋರಿಸುತ್ತದೆ.
ಈ ದುಸ್ಥಿತಿಯನ್ನು ಗಮನಿಸಿದ ಮಾತಂಗ ಮುನಿ ಪರಿವಾರ ಸೇವಾ ಟ್ರಸ್ಟ್ (ರಿ.) ಸಂಸ್ಥೆ ಕುಟುಂಬಕ್ಕೆ ನೆರವಾಗಲು ಮುಂದಾಗಿದೆ. ಮಗನ ಶಿಕ್ಷಣವನ್ನು ಮುಂದುವರಿಸುವುದು ಹಾಗೂ ಮಂಜಮ್ಮ ಅವರ ಚಿಕಿತ್ಸೆಗೆ ಸಹಾಯ ಮಾಡುವುದಾಗಿ ಟ್ರಸ್ಟ್ನ ಸದಸ್ಯರು ಭರವಸೆ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಗುರುಮೂರ್ತಿ, ಶಾಂತರಾಜು ಮತ್ತು ಅಧ್ಯಕ್ಷರಾದ ತೇಜಾ ಉಪಸ್ಥಿತರಿದ್ದರು.
ಸಮಾಜದ ವಿವಿಧ ವಲಯಗಳಿಂದ ಈ ಕುಟುಂಬಕ್ಕೆ ನೆರವು ದೊರಕಬೇಕಾದ ಅಗತ್ಯ ತುರ್ತಾಗಿದೆ. ಸರ್ಕಾರ ಮತ್ತು ಜನಪ್ರತಿನಿಧಿಗಳು ಕೂಡಲೇ ಸ್ಪಂದಿಸಿ ಮನೆ ನಿರ್ಮಾಣ, ವೈದ್ಯಕೀಯ ನೆರವು ಹಾಗೂ ಶಿಕ್ಷಣ ಸಹಾಯ ಒದಗಿಸಿದರೆ, ಈ ಕುಟುಂಬದ ಬದುಕಿಗೆ ಹೊಸ ದಾರಿ ದೊರೆಯಬಹುದು.ಇಂತಹ ಸಂಕಷ್ಟದಲ್ಲಿರುವ ಕುಟುಂಬಗಳಿಗೆ ನೆರವು ನೀಡುವುದು ಸಮಾಜದಲ್ಲಿರುವ ನಮ್ಮೆಲ್ಲರ ಹೊಣೆಗಾರಿಕೆ ಆಗಿದೆ.
ವರದಿ: ದೇವರಾಜು R ಚಿಕ್ಕನಾಯಕನಹಳ್ಳಿ.
ಕೆಳಗಿನ #ಲಿಂಕ್ ಬಳಸಿ #ಜನತಾ24 #ವಾಟ್ಸಾಪ್_ಗ್ರೂಪ್ ಸೇರಿರಿ https://chat.whatsapp.com/Jf6jZ0gyQAEA5GBRpHnkrv
https://news.google.com/publications/CAAqBwgKMPHDwgswk9_ZAw?hl=en-IN&gl=IN&ceid=IN:en
https://youtube.com/@janataa24?si=XsFcych2GMH0O6Gv
https://www.janataa24.com/turuvekere-protesting-against-stone-mining/
IAS,IPS,KAS, ಕನಸು ಹೊತ್ತ ವಿದ್ಯಾರ್ಥಿಗಳಿಗೆ ಗಾಡ್ ಫಾದರ್ ಆಗಿ ನಿಂತ ಮೂರ್ತಿ ಸಿ ಎಸ್.
Turuvekere: ಫಸಲಿಗೆ ಬಂದ 40 ತೆಂಗಿನ ಮರಗಳನ್ನ ಕಡಿದುರುಳಿಸಿದ ಕಿಡಿಗೇಡಿಗಳು.
Operation Sindor: POK ಪಾಕಿಸ್ತಾನದ 9 ಉಗ್ರ ನೆಲೆಗಳನ್ನು ನೆಲಸಮಗೊಳಿಸಿದ ಭಾರತ ಸೇನೆ.
